MAANS: SIKKO

MAANS: SIKKO

Maans is wies met zien lutje hondje Pjotr en moakt zich der steeds meer zörgen over dat t beestje zo voak pissen moet. De dierendokter zee dat t gewoon olderdom was, mor Maans was der met aan. Misschien kwam t wel deur t voer en doarom besloot er om es noar de dierewinkel te goan.

Hij kende de boas van e winkel goed, want ze hadden soamen op t toneel zitten. De man was zo’n bietje de regisseur en was mor wat bliede west met Maans, die altied groag een kleine wat aparte rol speulde en begon drekst te meroakelen toen Maans binnen kwam. Mor Maans kwam drekst ter zoake.

‘Moest es luusteren. Pjotr moet tegenwoordeg zo voak pissen, zol doar niet wat aan te doen weeden met voer?’

Hij kreeg drekst een lezing over olde-hondjes-kwoalen en t belang van goeie en gebalanceerde voeding op de spijsvertering en werd winkt om met te lopen noar een specioale stelling ien de winkel.

Pjotr dribbelde ondertussen wat tussen de schappen deur en had van t winkelhulpke al n lekker honnekoekje kregen.
Hij bekeek e vissen , e vogels en e knienen en stopte bij n hok met drie cavia’s. Ien e hoek zat n olde bruune cavia aan n stuk woddel te knoagen. Dat beestje kwam Pjotr bekend veur’.

‘Verrek ik kin dij. Doe bist van e tillevisie, van Noord, Kin dat kloppen’

 ‘Jazeker jong hest geliek. Mien noam is Sikko, beter bekend as e EKavia. Ien 2012 was ik bij Noord om de uutslag van voetbalwedstrieden te veurspellen. Dat hadden ze oafkeken van e Duutsers, die Paul de Octopus uutvonden hadden. Man, ien een poar week tied was ik beroemd in hiel Nederland. Ik kwam voak op tillevisie en der is zelfs n verske over me moakt.’

 ‘Mor hastoe zoveul verstand van voetballen dan?’

 ‘Nee jong hielmoal niet, ik liep gewoon noar de kaant woar de mieste voer lag! Dat EK liep slecht oaf veur Oranje, mor ik had e tied van mien leven. Ik mocht noar Bingooavenden, schoelfeesten, openings van winkels en ik werd n belangrieke bezienwoardegheid hier ien e winkel. De boas was zo wies met me dat er n specioale Sikko-Kooi veur me moakt had, met n bordje ‘Niet te koop: vanwege vervroegd pensioen.’ Sindsdien heb ik n leven as n luus op n zere kop. Ik huuf alleneg mor veur noageslacht te zörgen. Kiek dat bennen Cor en Corina mien jongste zeun en dochter!’

Pjotr knikt noar beide jonkies die sprekend op Sikko lijken, al is t met cavia’s net as met Chinezen, ze lieken alpmoal op mekoar.

‘En moest nou nog voak optreden?’

 ‘Ien juni zol ik weer vol aan e bak bij Noord, mor ja toen  kwam die Corona-brut der tussen en is alles oaflast. Had ik mooi tied om die twee jongen op de wereld te helpen. Mor as ze me neudeg hemmen. Zo huuven mor te piepen.’

Maans ston met zak voer bij de kassa en floot zien hondje.

‘Dit is t beste voer wast kriegen kist veur Pjotr!’, zee de winkelier, ‘Dat hemmen je toch groag over veur je grootste vriend!’ en hij nam 25 Euro ien ontvangst.

Pjotr kreeg nog zo’n lekker honnekoekje, dat kon der wel van oaf. As er eefkes loater veur ien bakje van e fiets noast zien zak voer zit, denkt er nog eefkes aan die wereldberoemde EKavia en zien lied.

Reageren is niet mogelijk.